संविधानसभा बिथोलिए पुनः जनविद्रोहको बाटो
नेकपा माओवादीका केन्द्रीय सदस्य मात्रिका यादवले संविधानसभाको प्रक्रिया बिथोलिए आफूहरुले पुनः जनविद्रोहको बाटो अँगाल्ने चेतावनी दिनुभएको छ । आज राजधानीमा नेता यादवले संविधानसभामा जाने प्राथमिक सर्तहरु पुरा हुन नसकेको बताउँदै जनआन्दोलनको म्याण्डेटप्रति सरकार तथा दल गम्भीर नभएको आरोप लगाउनुभयो ।
प्रधानमन्त्रीलाई ८ बुँदे सहमतिमा सही गरेपनि संसदीय दल संसद विघठन गर्न नमानिरहनुमा दलहरुबीच नीतिगत भिन्नता देखा परेको उहाँको भनाइ थियो । यसप्रकारको विरोधाभाषपूर्ण परिस्थितिले संविधानसभासम्म पुग्ने बाटोमा अवरोध सिर्जना गर्नसक्ने भएकाले यसप्रति सबै सचेत रहनुपर्ने यादवले बताउनुभयो ।
यादवले अन्तरिम संविधान नै मुलुकको समस्या जड राजतन्त्रलाई उखेली सबैले लोकतान्त्रिक गणतन्त्रमा सहमति जनाउनुपर्ने आजको आवश्यकता भएको स्पष्ट पार्नुभयो । आन्दोलनविरोधी शक्तिहरुको चलखेल रोक्न मुलुकलाई संविधानसभासम्म पुर्याउन जनताको आन्दोलन तथा खबरदारीको खाँचो यादवले औल्याउनुभयो । माओवादी नेता यादवले संविधानसभाको निर्वाचन पूर्व देशमा उपेक्षित मधेशी जातिलाई सरकारले गाउँमै गएर नागरिकता उपलव्ध गराउनुपर्नेमा जोड दिनुभयो । त्यसो नगरिए कोही पनि मधेशी जनताले निर्वाचनमा भाग नलिने उहाँले चेतावनी दिनुभयो ।
