काठमाडौं– निकै दिनको प्रयासपछि अन्ततः प्रमुख चार राजनीतिक दल राष्ट्रिय सहमतिको सरकार गठन गर्न सहमत भएका छन्।
आज मंगलबार दिउँसो माओवादी संविधानसभा दलको कार्यालय, सिंहदरबारमा बसेको प्रमुख दल नेपाली काँग्रेस, एमाले, माओवादी र मधेशी जनअधिकार फोरमका शीर्ष नेताहरूको बैठकले राष्ट्रिय सरकार गठन गर्ने सैद्धान्तिक सहमति गर्दै त्यसका लागि एक कार्यदल गठन गरेको छ। कार्यदलले माओवादीले प्रस्ताव गरेको नीति तथा कार्यक्रमलाई परिमार्जनसहित अन्तिम रूप दिने बताइएको छ। कार्यदलमा चारै दलका प्रतिनिधि रहने बताइएको छ। तर कार्यदलमा रहने दलका प्रतिनिधि भने तय भईसकेको छैन।
राष्ट्रपति डा. रामवरण यादवले सहमतिका आधारमा सरकार गठन गर्न माओवादीलाई दिएको समयसीमा आजै सकिएकाले ठूलो दलको हैसियतले माओवादीले अरू तीन दिनका लागि राष्ट्रपतिसँग समय माग गर्ने सहमति पनि बैठकमा भएको छ। बैठकपछि जनपुकार डट कमसँग कुराकानी गर्दै नेपाली काँग्रेसका सहमहामन्त्री एवं प्रवक्ता अर्जुननरसिंह केसीले राष्ट्रिय सहमतिको सरकार गठन गर्न प्रमुख दलहरू सहमत भएको जानकारी दिनुभयो। उहाँले कार्यदलले तीन दिनभित्र न्यूनतम साझा कार्यक्रम तय गरी शीर्ष बैठकमा पेश गर्ने सैद्धान्तिक सहमति भएको समेत बताउनुभयो।
एक अर्को प्रसंगमा नेता केसीले नयाँ सरकारको नेतृत्व कसले गर्ने भन्ने बिषय कार्यदलले टुङ्गो लगाउने बताउनुभयो। यस अगाडि हिजो चार दलबीच पूर्व सहमति कार्यान्वयन गरी विश्वासको वातावरण बनाउने सहमति भएको थियो। सोही सहमति अनुसार माओवादीका अध्यक्ष प्रच48डले आज मंगलबार एक प्रेस विज्ञप्ति जारी गरि वाईसीएलको ब्यारेक संरचना हटेको र कब्जा गरिएका घरजग्गा फिर्ता गर्ने घोषणा गर्नेछन्। यस्तै सरकारले शिविरमा रहेका माओवादी लडाकूहरूको विगत १३ महिनादेखि रोकिएको तलबभत्ता तत्काल उपलब्ध गराउने सहमति भएको थियो।
बैठकमा माओवादीले एकतर्फी रूपमा नीति तथा कार्यक्रम तयार गरेको भन्दै तीन दलीय गठबन्धन काँग्रेस, एमाले र फोरमले विरोध गरेका थिए। ती दलका नेताहरूले संविधानसभामा सबैभन्दा ठूलो दल रहेको माओवादीले जिम्मेवार भूमिका निर्वाह गर्नुपर्नेमा आफैंले विभिन्न शर्त राखेर बखेडा निकालेकोमा आलोचना समेत गरेका थिए।