काठमाडौं, ६ कात्तिक
राजधानीका सडकमा दैनिक तीन लाख ७० हजार सवारीसाधन गुड्छन्, जसमध्ये औसत आठवटा सवारीसाधन दुर्घटनामा पर्ने गरेका छन् । महानगरीय ट्राफिक प्रहरी महाशाखाका अनुुसार पछिल्लो तीन वर्षमा नौ हजार पाँच सय ५६ सवारी दुर्घटना भए । सबैभन्दा लोकपि्रय सवारीसाधन मोटरसाइकल नै सबैभन्दा बढी दुर्घटनामा पर्ने गरेको महाशाखाको अध्ययनले देखाएको छ । काठमाडौंमा दैनिक गुड्ने सवारीसाधनमध्ये मोटरसाइकलको संख्या मात्रै दुई लाख छ । तीन वर्षको अवधिमा तीन हजार नौ सय ९७ वटा मोटरसाइकल दुर्घटनामा परेका छन् । मोटरसाइकलपछि ट्रकको संख्या बढी छ । तीन वर्षमा आठ सय ५२ वटा ट्रक र दुई सय ८२ वटा टेम्पो दुर्घटनामा परेका थिए ।

तीन वर्षको तथ्यांकले प्रत्येक वर्ष दुर्घटनाको संख्या बढेको देखाउँछ । ०६२/०६३ मा दुई हजार आठ सय ३१ वटा सवारी दुर्घटना भएकोमा ०६३/०६४ मा बढेर तीन हजार दुई सय ३३ दुर्घटना भए । यस्तै, ०६४/०६५ मा तीन हजार चार सय ९२ वटा दुर्घटना भएका थिए । यस वर्षको भदौ र असोज महिनामा तीन सय ७५ सवारी दुर्घटना भएको महाशाखाले जनाएको छ । ०६२/०६३ मा ९३ जनाको सवारी दुर्घटनामा परी मृत्यु भएकोमा ०६३/०६४ मा पनि ९३ जनाकै मृत्यु भएको थियो । तर, ०६४/०६५ मा बढेर एक सय २० जनाको मृत्यु भयो । चालू आर्थिक वर्षको दुई महिनामै ५५ जनाको मृत्यु भइसकेको छ ।

चालू वर्ष भदौ र असोजमा तीन सय ७५ सवारी दुर्घटना भए । महाशाखाको तथ्यांकअनुसार साप्ताहिक रूपमा आइतबार सबैभन्दा बढी दुर्घटना हुने गरेका छन् भने शनिबार सबैभन्दा कम । दुई महिनाको अवधिमा भएका दुर्घटनामध्ये आइतबार ७५ र शनिबार १० वटा मात्र दुर्घटना भएका छन् । तथ्यांकअनुसार सोमबार ६६, मंगलबार ६०, बुधबार ५५, बिहीबार ४८ र शुक्रबार ५४ वटा सवारी दुर्घटना भएका छन् ।

दुर्घटनाको समयअनुसार दिउँसो १२ बजेदेखि ६ बजेभित्र सबैभन्दा धेरै दुर्घटना हुने गरेको अध्ययनले देखाएको छ । महानगरीय ट्राफिक प्रहरी महाशाखाले २४ घन्टालाई तीन भागमा विभाजन गरी गरेको अध्ययनअनुुसार दुई महिनाको अवधिमा मध्याह्न १२ बजेदेखि ६ बजेभित्र एक सय ५८ वटा सवारी दुर्घटना भएका थिए । यस्तै, बेलुका ६ बजेदेखि बिहान ६ बजेसम्ममा एक सय ३० र बिहान ६ बजेदेखि मध्याह्न १२ बजेसम्म केवल ८७ वटा मात्र दुर्घटना भएका छन् ।

‘प्रत्येक वर्ष सवारी चापसँगै दुर्घटना बढेको छ,’ मुद्दा शाखाका प्रहरी निरीक्षक राजन भेटवालले भने । दुर्घटनाको संख्यासँगै सवारी दुर्घटनामा मृत्यु हुने र गम्भीर घाइते हुनेहरूको संख्यासमेत बढेको छ । प्रत्येक माहिना औसत १० जना दुर्घटनामा परेर मर्ने गरेको अध्ययनबाट पत्ता लागेको छ । यसमा बालबालिकाको संख्या उल्लेख्य छ । भेटवाल बढ्दो सवारी चाप र चालकको लापरबाही दुर्घटना बढ्नुको कारण रहेको बताउँछन् । ट्राफिक नियम पालना नगर्ने, स्वरूप परिवर्तन गर्ने र स्पिड नियन्त्रण नगर्ने कारण मोटरसाइकलको दुर्घटना बढी हुने गरेको उनको ठहर छ । महाशाखाले साप्ताहिक रूपमा सवारी दुर्घटनाको समीक्षा गरी रणनीति बनाएको छ । तर, तीन जिल्लाका लागि आठ सय ८७ मात्र ट्राफिक छन् । यसको एकतिहाई संख्या काठमाडौंका सडकमा खटिने गरेको छ ।